Сёння ў Драгічыне адбылася першая арганізацыйная сесія райсавета 29-га склікання. У яе працы прыняў удзел старшыня райвыканкама Аляксандр Дарашэнка. Паседжанне адкрыла старшыня раённай выбарчай камісіі Алена Багамаз.
Па выніках праведзеных выбараў у Драгічынскі раённы Савет дэпутатаў выбраны 25 дэпутатаў. У галасаванні прынялі ўдзел 81,2% выбаршчыкаў.
26% дэпутатаў прадстаўляюць сацыяльную сферу, 22% - работнікі дзяржорганаў, 16% - сельскай гаспадаркі, 12% - праваахоўныя органы і МНС, 8% - сфера ЖКГ, 16% - іншыя сферы.
Згодна з дзейным заканадаўствам, выбары старшыні Савета адбыліся ў фармаце тайнага галасавання. Дэпутацкі корпус аднагалосна прагаласаваў за кандыдатуру Уладзіміра Нярэда, дэпутата па Радастоўскай выбарчай акрузе №24, які працаваў на пасадзе намесніка старшыні райвыканкама.
З выбраннем новага кіраўніка дэпутацкага корпуса раёна павіншаваў Аляксандр Дарашэнка.
- Вельмі важна, калі ўсе галіны ўлады працуюць зладжана і нацэлены на агульны вынік. Уладзімір Іванавіч - чалавек з найбагатым практычным вопытам. Упэўнены, што ён працягне закладзеныя ім традыцыі ў новай для яго якасці і прыўнясе новыя ідэі ў працу дэпутацкага корпуса, - адзначыў старшыня райвыканкама.
Уладзімір Нярэд:
«Вялікі дзякуй усім за давер. Разам мы прыменім вопыт, які маем у нас, каб нашы грамадзяне, наша краіна жылі яшчэ лепш».
Падчас першага паседжання абраны намеснік старшыні райсавета - гэтую пасаду на грамадскіх пачатках заняла Алена Бандарук, сфарміраваны працоўныя дэпутацкія камісіі і прыняты рэгламент Савета.
